मेरी आमा

by Arun Chhetri Anuragi on Saturday, July 23, 2011 at 11:27am

मेरी आमा;तिमीले
खुसुक्क झोलामा हालिदिएको
चरेसको थाल र कचौरा
अनि मेरो मुग्लानको जिबन
कठै बिचरा म!!!
उता अझै पनि
साँझ-बिहान,सुख-दुख
मिठो चोखो पाक्दा
मेरो बाबु भएको भए....
भन्छौ होला हैन आमा
+ + +
आज मेरो गाउँ
मेरो घर
र
मेरी आमा तिम्रो छाँया
अगाडी ल्याउन खोजे
आयो सारा बिगत
तँ छाड म छाड गरेर
तर आमा
आएन त्यो पिर्का र चकटी
नदेखियौ तिमि नै
चुलोमा ढुङ्ग्रो लिएर
फू,फू,फू गर्दै अगुल्टो
ठोसेकी,धुँवामा धैसिएर
खक्-खक् खोकेकी,
नपाकेको थियो
गुन्द्रुक र मसेउरा
न त थियो पतिना
र गोलभेंडाको चट्नी
त्यो मल्खातको
हरियो र कलिलो रायो
अँह कतै पनि देखिन
न जाँतो नै घुमेको थियो
कोदोको ओइरो लिएर
अनि कहाँ देख्नु त
ढिडोको बहान
अनि चुहिन्थ्यो
त्यो खरको पालि
यो वर्षायाम
अगेना माथि
मकैको झोती
अँह
केहि पनि देखिन
+ + +
यी सबै सर्जाम
एकै ठाउँ जुटे मात्र
मेरी आमा तिमि हुने छौ
तिमि भए मात्र मेरो घर हुनेछ
मेरो घर र मेरो देश भए मात्र
म हुनेछु
आज लाख कोशिस गरें
हामि संगै बसेर
हातमुख जोडौ भनि
तर सकिन
केवल मैलिएको तस्बिर जस्तो
फिक्का अनि धमिलो देखें
तर किन आमा???
+ + +
मलाई माफ गर आमा
म फेरिएको छैन
मैले माया मारेको छैन
म उही तिम्रो छोरो
सानोमा सिस्नो देखाएर
पढ..,पढ.. भनेको
तिम्रो फरिया समाएर
रुदै-रुदै पछाएको
ढाडमा पटुकी बाँधेर
हलो-बाउसो गरेको
उही तिम्रो बाबु हुँ
उही तिम्रो काले
तिम्रो यादमा
मुखमा पुराएको गाँस
फिर्ता गरें
अनि गहभरि आँशु गर्दै
तिम्रो तस्बिर हेर्न थालें
मेरी आमा.....
तिमीलाई धेरै सम्झना
अनि सेवा ढोग

+ + + + +